NESOCA

स्तरीय शिक्षा व माँभायया संरक्षण यायेगु उद्देश्य ज्वना न्हृयाः वने त्यंगु “नेवा बस्ती नेवाः स्कुल प्रोजेक्ट’ यात थिथि शुभचिन्तक पिनिगु ग्वाहाली व हःपा प्राप्त जुया च्वंगु दु । प्रोजेक्टया अबधारणा र्सार्वजनिक जूगु लच्छिया दुने थ्व प्रोजेक्टयात करिब रु. २ लाख आर्थिक सहयोग प्राप्त जुइ धुकूगु दु । अले विभिन्न व्यक्ति व संस्था पाखें सहयोग यायेगु वचन नं प्राप्त जुया च्वंगु दु

थ्व हे कारणं जिपिं थ्व प्रोजेक्टया अबधारणा कथं द्रूत गतिं न्हृयाः वने त्यनागु दु । खँया नाप ज्या न यायेमा धइगु जिमिगु मान्यता कथं थुगु हे दँय् थेच्वय छगु नेवाः स्कूल चायेकेगु क्वछिनागु दु । थ्व झी सकसिगुं निंतिं लसताया खँ खः । थुगु स्कुलया निम्ति माःगु आर्थिक बन्दोबस्त व प्राविधिक ग्वाहाली प्रोजेक्ट पाखें उपलब्ध याना बिइगु जुइ सा स्कुल संचालनया अभिभारा थुगु प्रोजेक्टया स्थानीय कजि भाजु नविन थेच्वमिं कयादि । स्कुल संचालनय् वयेधुंकाः प्रोजेक्ट पाखें स्कुलया नियमित अनुगमन यानाः आवश्यक सल्लाह व निर्देशन विया च्वनी ।

भाजु नविन थेच्वमि शिक्षण पेशाय् तःदँया अनुभव दुम्ह व्यक्ति खःसा नेपालभाषाया गतिविधिई नं वयकयागु यक्व देन दु । थुगु स्कुलया लागि शिक्षिका व आयापिन्त मोर्डन नेवाः इङ्गलिस स्कुल पाखें आवश्यक तालिम बिइगु ज्या नं जुया च्वंगु दु । थ्व ल्याखँ नेवाः बस्ती नेवाः प्रोजेक्टया कुतलय् चाले त्यंगु थुगु न्हापांगु स्कुल सुथांलाक न्हृयाः वनी धइगु जिमित विश्वास दु ।

प्रोजेक्टया स्रोतं सम्भव जूथाय् तक प्रोजेक्टया पहलं नेवाः स्कुल चायकेगु व उकिया अलावा स्कुल चायेके न्हृयाःपिन्त उत्प्रेरित यानाः नेवा स्कुलया ल्याः अप्वयेका यंकेगु नं थ्व प्रोजेक्टया उद्देश्य खः । थ्वहे सिलसिलाय् थिथि व्यक्तिपिन्त स्कुल चायेकेत उत्प्रेरित यायेगु व दया च्वने धुंकूगु स्कुलय् मस्तयत ऐच्छिक रुपय् जुसां नेवाःभाय् ब्वंकेत नं प्रोजेक्ट पाखें इनाप याना च्वनागु दु । थुकिया लागि जिमित सम्बन्धित स्कुलत व ब्यक्तिपिनि पाखें सकारात्मक लिसः वया च्वंगु दु ।

न्हृयाम्हेस्यां यानाः नं न्हृयाथे याना नं नेवाः भाययात स्कुल स्कुलय् न्यंका यंके माःगु दु । नेपाल भाषाया संरक्षण यायेगु दायित्व झी सकसिगुं खः । उकें सकल प्रिन्सिपल, अभिभावक, लगायत सकल भाषाप्रेमी पिन्त थ्व प्रोजेक्टया उद्देश्य पुवंकेगु ज्याय् थःथःगु थासं ग्वाहाली याना दियेत दुनगः निसें इनाप नं याना च्वना । सभाय् ।

प्रेषक
दिपक तुलाधर
संयोजक
नेवाः बस्ती नेवाः स्कुल प्रोजेक्ट
तिथिः ने.सं. ११२७ सिल्लाथ्व १२